Fflio Dub- dde-gliciwch a dewiswch 'Save Target As..' i lawrlwytho .

Llwybr Llaethog

Mae'r ddeuawd Kevs Ford a John Griffiths wedi bod yn cynhyrchu cerddoriaeth gyda'i gilydd ers 1984. Ffurfiwyd Llwybr Llaethog ym Mlaenau Ffestiniog dros ugain mlynedd yn ôl, ers hynny mae'r ddeuawd arloesol wedi llwyddo i wthio ffiniau cerddoriaeth Gymraeg dro ar ôl tro.

Rhyddhawyd eu senglau cyntaf Dull di Drais a Tour de France yn 1986 a '87 ac ers hynny mae Llwybr Llaethog wedi bod yn gwthio'i harddull unigryw ar bawb o fewn clyw. Mae'r ffaith eu bod yn dal i gynhyrchu ar ôl ugain mlynedd yn dyst i'w poblogrwydd, ac yn brawf fod y pair diwaelod o syniadau chwyldroadol yn dal i fodoli. Mae eu swn dub- reggae wedi ei gyplysu a hip-hop a synau electroneg wedi ennyn parch i'r ddau gan gonglfaeni'r byd cerddorol ac wedi arwain at sesiynau John Peel yn ogystal â sylw mewn cylchgronau rhyngwladol megis NME a Melody Maker. Teithiodd y ddau gyda'r Super Furry Animals nol ynghanol y nawdegau, ac fe ofynnodd yr SFA iddynt ail-gymysgu traciau ganddynt ar gyfer y DVD Phantom Phorce. Dros y blynyddoedd mae Llwybr Llaethog wedi cyd-weithio gyda llwythi o artistiaid gwahanol gan gynnwys yr SFA, Anweledig a'r Tystion.

Mega-Tidy yw'r nawfed albym i Kevs a John ei ryddhau fel Llwybr Llaethog, ac oddi ar yr albym hon y cymerir Fflio Dub. Mae'r ddau wedi llwyddo unwaith eto i ddenu enwau mawr i weithio gyda nhw ar yr albym newydd. Arno clywn gyfraniadau gan Geraint Jarman, Li'l Miss, MC Sleifar, Ed Holden yn ogystal ag enwau newydd, llai adnabyddus fel Cofi Bach a Tew Shady. Mae'r albym newydd yn dal i wthio ffiniau ac yn dangos fod poblogrwydd y ddau yn dal mor fawr ag erioed.

Am fwy o wybodaeth am Llwybr Llaethog neu 'Mega Tidy' cliciwch yma.